రోహిత్ శర్మ–విరాట్ కోహ్లీ వివాదంపై కేంద్ర మంత్రి స్పందన

రోహిత్ శర్మ, విరాట్ కోహ్లీ వివాదంపై కేంద్ర యువజన వ్యవహారాలు, క్రీడాశాఖ మంత్రి అనురాగ్ ఠాకూర్ స్పందించారు. ఏ ఒక్క ఆటగాడూ ఆటకన్నా ఎక్కువేం కాదని తేల్చి చెప్పారు. ఆటలో పారదర్శకత ఉండాల్సిందేనని స్పష్టం చేశారు. ‘‘అందరికన్నా ఆటే ఎక్కువ. ఏ గేమ్ లో ఏయే ఆటగాళ్ల మధ్య ఏం జరుగుతుందన్నది నేను చెప్పలేను. ఆ సమాచారాన్ని నేనివ్వలేను. అది ఆయా క్రీడా సమాఖ్యలు, సంఘాల పని. వాళ్లే ఆ సమాచారం ఇస్తే బాగుంటుంది’’ అని అన్నారు.


కాగా, ఇటీవల వన్డే సారథ్య బాధ్యతల నుంచి కోహ్లీని తప్పించి రోహిత్ శర్మకు బాధ్యతలు అప్పగించిన సంగతి తెలిసిందే. అప్పట్నుంచి క్రికెట్ లో వాతావరణం కాస్త వేడెక్కింది. గాయమంటూ టెస్టులకు రోహిత్ దూరమయ్యాడు. ఆ మర్నాడే కూతురు బర్త్ డే అంటూ కోహ్లీ కూడా వన్డేలకు అందుబాటులో ఉండనన్నాడంటూ ఓ అధికారి చెప్పుకొచ్చారు.

ఆ తర్వాత కోహ్లీ అధికారికంగా ప్రకటించలేదు అని చెప్పకపోయినా.. అప్పటికే అజారుద్దీన్, కీర్తి ఆజాద్ లాంటి మాజీలు రోహిత్, కోహ్లీ మధ్య ఏదో జరుగుతోందన్న అంచనాకు వచ్చేశారు. అది క్రికెట్ కు ఎంత మాత్రమూ మంచిది కాదంటూ హితవు చెప్పే ప్రయత్నం చేశారు.